മെഡിക്കൽ കോളജിലെ കോവിഡ് ചികിത്സാ കേന്ദ്രത്തിൽ നിന്ന് ഡ്രാക്കുള സുരേഷ് മുങ്ങി
കൊച്ചി: എറണാകുളം മെഡിക്കൽ കോളജിലെ കോവിഡ് ചികിത്സാ കേന്ദ്രത്തിൽ നിന്ന് മോഷണക്കേസ് പ്രതി ഡ്രാക്കുള സുരേഷ് തടവുചാടി. കോവിഡ് നെഗറ്റീവായതോടെ ഇന്നു രാവിലെ സുരേഷിനെ ആലുവ സബ് ജയിലിലേക്ക് മാറ്റാൻ പുറത്തിറക്കിയപ്പോഴാണ് പൊലീസുകാരുടെ കണ്ണുവെട്ടിച്ച് മുങ്ങിയത്. പൊലീസുകാർ പിപിഇ കിറ്റ് ധരിക്കാൻ പോയപ്പോഴായിരുന്നു സുരേഷ് മുങ്ങിയതെന്ന് പറയുന്നു.
പെരുമ്പാവൂരിൽ ഒരു മോഷണക്കേസിൽ പിടിയിലായ സുരേഷ് നേരത്തെ രണ്ടു പ്രാവശ്യം കറുകുറ്റിയിലെ എഫ്എൽസിറ്റിയിൽ നിന്ന് രക്ഷപ്പെട്ടിരുന്നു. പൊലീസിനെ ആക്രമിച്ചായിരുന്നു കടന്നു കളഞ്ഞത്. ഇതോടെ റൂറൽ എസ്പി കെ.കാർത്തിക്കിന്റെ നേതൃത്വത്തിൽ പ്രത്യേക പൊലീസ് സംഘം രൂപീകരിച്ച് അന്വേഷണം നടത്തി വരുന്നതിനിടെ പിന്നീട് പെരുമ്പാവൂരിൽ വച്ച് പിടിയിലാവുകയായിരുന്നു.
തുടർന്ന് നിരീക്ഷണത്തിൽ കഴിഞ്ഞ ശേഷം നടത്തിയ കോവിഡ് പരിശോധനയിൽ രോഗം സ്ഥിരീകരിച്ചതോടെയാണ് കളമശേരി മെഡിക്കൽ കോളജ് ആശുപത്രിയിലെ എഫ് വാർഡിൽ പ്രവേശിപ്പിച്ചത്. ഇയാൾക്കായി അന്വേഷണം പുരോഗമിക്കുകയാണ്.